Samux rayonunda həyat yoldaşına xəsarət yetirməkdə təqsirləndirilən Vidadi Qurbanov (ad şərtidir) barəsində məhkəmə qərarı verilib.
Gencexeber.az-ın məlumatına görə, hadisə rayonun İnstitut qəsəbəsində baş verib.
İş materiallarına görə, hadisə günü Vidadi Qurbanov sərxoş vəziyyətdə evə gəlib, həyat yoldaşı Sevdadan (ad şərtidir) yemək hazırlamasını istəyib. Qadın isə evdə yemək hazırlamaq üçün ərzaq olmadığını deyib.
Bu zaman ər-arvad arasında mübahisə başlayıb. Vidadi yumruq zərbələri ilə arvadının baş və burun nahiyəsinə zərbələr vuraraq xəsarət yetirib. Nəticədə qadının burnu sınıb.
Samux Rayon Məhkəməsində keçirilən iclasda təqsirləndirilən şəxs ittihamı qəbul edib. O bildirib ki, uzun illərdir spirtli içki aludəçisidir və sərxoş olduğu zaman davranışlarına nəzarət etməkdə çətinlik çəkir.
Məhkəmənin yekun qərarı ilə Vidadi Qurbanov Cinayət Məcəlləsinin 128-ci maddəsi ilə təqsirli bilinərək 360 saat ictimai işlər cəzasına məhkum edilib.
Fidan İlqar
