Bu gün erməni təxribatı zaman şəhid olan həmvətənlərimizin ildönümüdür.
12-14 sentyabr 2022-ci il tarixində Ermənistan silahlı qüvvәlәri tərəfindən genişmiqyaslı təxribat baş tutub. Bu vaxt Azərbaycan ordusunun 80 nəfər hərbi qulluqçusu şəhidlik zirvəsinə ucalıb. Onlardan 4 nəfər Gəncədən olub: leytenant Erkin Hüseynov, gizir Asiman İmamverdiyev, əsgərlər Üzeyir Әliyev və Nihad Verdiyev.
Erkin Ədalət oğlu Hüseynov 12 oktyabr 1998-ci ildə anadan olub. Ali təhsilini Bakı Dövlət Universitetində alıb. Leytenant Hüseynov 12 sentyabr 2022-ci ildə Kəlbəcər rayonunda şəhidlik zirvəsinə yüksəlib.
Asiman Mehman oğlu İmamverdiyev 2 avqust 1988-ci ildə anadan olub. Azərbaycan Silahlı Qüvvələrinin giziri Vətən müharibəsi veteranı idi. O, 12 sentyabr 2022-ci ildə Kəlbəcər rayonunda şəhidlik zirvəsinə ucalıb.
Üzeyir Sabir oğlu Əliyev 24 fevral 1993-cü ildə Qızılqaya qəsəbəsində dünyaya gəlib. 2022-ci ilin sentyabr ayında düşmən təxribatının qarşısını alan zaman şəhid olub. 14 sentyabr tarixində nəşi Gəncəyə gətirilərək vida mərasimi keçirilib. Daha sonra Göygöl rayon Şəhidlər xiyabanında dəfn olunub.
Üzeyir Əliyev I Qarabağ müharibəsində şəhid olan Arif Mahmudovun bacısı oğlu idi.
Nihad Nicat oğlu Verdiyev 16 dekabr 2003-cü ildə Daşkəsən rayon Qaraqollar kəndində anadan olub. 2010-2021-ci illərdə Gəncə şəhərində yerləşən Kəlbəcər rayon 109 saylı tam orta məktəbdə təhsil alıb.
Vətən müharibəsi başlayan zaman könüllü iştirak barədə müraciət edib, lakin zərurət olmadığından və məktəbdə oxuduğu üçün orduya götürülməyib. 20 dekabr 2021-ci ildə müddətli həqiqi hərbi xidmətə çağırılıb. Bir müddət sonra könüllü şəkildə hərbi hissə rəhbərliyinə xidmətini "KOMANDO" Xüsusi Təyinatlı Qüvvələrində davam etdirməsi barədə müraciət edib. 2022-ci ilin sentyabrında erməni təxribatı zamanı döyüşlərdə iştirak edib. Burada Nihad Verdiyev və bir neçə döyüş yoldaşı şəhidlik zirvəsinə ucalıb. Neytral ərazidə qaldığı üçün şəhidimizin nəşi 3 gün sonra — 16 sentyabr tarixində ailəsinə təhvil verilib və elə həmin gün də Gəncə Şəhidlər xiyabanında torpağa tapşırılıb.
