18 avqust görkəmli general Əliağa Şıxlinskinin anım günüdür.
Gencexeber.az xatırladır ki, 23 aprel 1865-ci ildə Qazax qəzasının Qazaxlı (indiki Aşağı Salahlı) kəndində anadan olub. 1886-cı ildə Sankt-Peterburqdakı Artilleriya Məktəbini bitirərək hərbi xidmətə başlayıb.
Şıxlinski 1904–1905-ci illər Rusiya-Yaponiya müharibəsində, o cümlədən Port-Arturun müdafiəsində iştirak edib və göstərdiyi igidliyə görə təltif olunub. Sonrakı illərdə artilleriya sahəsində tanınmış mütəxəssis kimi fəaliyyət göstərib, 1912-ci ildə general-mayor, 1917-ci ildə isə general-leytenant rütbəsi alıb. O, hərbi nəzəriyyəyə mühüm töhfələr verərək "Şıxlinski üçbucağı" və "Şıxlinski formulu" kimi yeniliklər yaradıb.
Azərbaycan Xalq Cümhuriyyəti dövründə Şıxlinski milli ordunun yaradılmasında mühüm rol oynayıb. 1918-ci ildə Əlahiddə Azərbaycan Korpusunun komandiri olub, daha sonra Səməd bəy Mehmandarovun müavini kimi Azərbaycanın hərbi quruculuğunda fəaliyyət göstərib. O, milli ordunun strukturunun formalaşdırılması və hərbi kadrların hazırlanması istiqamətində mühüm işlər görüb.
Əliağa Şıxlinski həm də hərbi alim və müəllif kimi tanınıb. Onun artilleriya üzrə əsərləri və "Rusca-türkcə müxtəsər hərbi lüğət" kitabı hərb elminə töhfələrindən hesab olunur. General 18 avqust 1943-cü ildə Bakıda vəfat edib.
