Gəncə şəhəri Heydər Əliyev prospektində yerləşən ikimərtəbəli bina sakinləri təmir adı ilə edilən dəyişikliklərdən sonra evlərinə su damdığını iddia edirlər.
Gencexeber.az məlumat verir ki, Heydər Əliyev prospekti 28, bina 2, ev 26-da yaşayan sakinlər aidiyyəti qurumlara səsləniblər. Onların sözlərinə görə, bina əvvəllər normal vəziyyətdə olub və dam örtüyündə problem olmayıb. Lakin dövlət tərəfindən ümumi görüntü naminə edilən dəyişikliklər nəticəsində binanın dam örtüyü yenilənib.
Sakinlər bildirirlər ki, bu dəyişikliklərdən sonra hər yağışdan sonra evlərinə su dammağa başlayıb. "Evimiz nə günə düşüb. Qonaq otağının tavanı saralıb, divar kağızları batıb, divarlar nəmişlik içindədir. Əvvəllər belə problem yox idi," – deyə şikayətçi sakin bildirib.
Sakinlər məsul qurumlara səslənərək problemi aradan qaldırmaq üçün təcili tədbirlər görülməsini istəyirlər.
