Məşhur bəstəkarımız Qəmbər Hüseynlinin anım günüdür.
Gencexeber.az məlumat verir ki, Qəmbər Hüseynli 16 aprel 1916-cı ildə Gəncə şəhərinin Dördyol məhəlləsində anadan olub.
Qəmbər 1925-ci ildə Gəncədə birinci dərəcəli məktəbdə təhsil almağa başlayıb. O, 1927-ci ildə orta məktəbdə oxuyarkən, Gəncə orta ixtisas musiqi məktəbinin tar sinfinə daxil olub. 1929-1934-cü illərdə isə Gəncə pedaqoji texnikumunda təhsil alıb.
Qəmbər Hüseynli 1935-ci ildə Bakı Musiqi Texnikumunda violonçel ixtisasında təhsilini davam edib. Daha sonra məktəbin bəstəkarlıq şöbəsinə keçib. Onun ilk əsəri 1939-cu ildə Cəfər Cabbarlının sözlərinə yazdığı "Tellər oynadı" romans-mahnısı olub.
1939-cu ildə Qəmbər Hüseynli Şuşanın Musiqi Texnikumuna direktor vəzifəsinə göndərilib. O, burada bir il çalışıb, sonra yenidən Bakıya qayıdıb. Bir müddət sonra, Qəmbər "Sazçı Qızlar" ansamblının təşkilatçısı və bədii rəhbəri kimi fəaliyyətə başlayıb.
1944-ci ildə bəstəkar, Hüseyn Cavidi və Əhməd Cavadı müdafiə etdiyinə görə, sovet hakimiyyəti tərəfindən həbs edilib. Azadlığa çıxandan sonra, Qəmbər 1947-1951-ci illərdə Gəncə Dövlət Filarmoniyasına və Gəncə Dövlət Dram Teatrının musiqi hissəsinə rəhbərlik edib, teatr tamaşaları üçün musiqi yazıb.
Məşhur sənətkarın "Cücələrim" mahnısı dünyanın 100-dən çox xalqının dilinə tərcümə olunub. Bu mahnı "Dünyanın ən yaxşı uşaq mahnıları" albomuna daxil edilib. "Cücələrim" Sovet cizgi filmi "Nu, poqodi!"nin bir bölümünə salınıb və Azərbaycan dilində səslənib.
Qəmbər Hüseynlinin ən məhşur əsərləri "Ay işığında", "Gecələr uzanaydı", "İlk məhəbbət", "Düşür yadıma", "Gülə-gülə", "Sən-sən" sayılır. O,1961-ci ildə Azərbaycan SSR-in "Əməkdar incəsənət xadimi" fəxri adına layiq görülüb, "Şərəf nişanı" ordeni ilə təltif edilib.
Qəmbər Hüseynlı ağır xəstəlikdən 31 iyul 1961-ci ildə (bəzi mənbələrdə 1 avqust) 45 yaşında Bakıda vəfat edib və Gəncədə dəfn edilib.
