Goranboy rayonunda 1997-ci il təvəllüdlü Azər sevgi münasibətində olduğu Aydanı (adlar şərtidir – red.) öldürməyə cəhd edib.
Demokrat.аz xəbər verir ki, hadisə 2024-cü ilin noyabrın 22-də Goranboy rayonunun Nərimanlı kəndində baş verib.
Lerik rayon sakini Azər həmin gün saat 12:30-da özünə məxsus "VAZ-2107" markalı avtomobili ilə qeyri-rəsmi ər-arvad münasibətində olduğu Aydanı işlədiyi Goran qəsəbəsində çay evinə aparıb.
Bu zaman aralarında mübahisə yaranıb. Azər Nərimanlı kəndinin ərazisində avtomobili saxlayıb. Aralarındakı mübahisə gərginləşdiyi üçün Aydanı öldürmək qərarına gəlib. O, avtomobildə saxladığı mətbəx bıçağını götürərək Aydanın baş və kürək nahiyələrindən çoxsaylı zərbələr vurub.
Aydan çağırılan təcili tibbi yardım avtomobili ilə Goranboy rayon mərkəzi xəstəxanasına çatdırılıb. Vaxtında göstərilmiş ixtisaslı tibbi yardım nəticəsində həyatı xilas edilib.
Azərin barəsində Cinayət Məcəlləsinin 29,120.2.4-cü (xüsusi amansızlıqla və ya təhlükəli üsulla adam öldürməyə cəhd) maddələri ilə ittiham elan edilib.
İş üzrə şahid qismində dindirilən təqsirləndirilən şəxsin qanuni nümayəndəsi olan valideynin sözlərinə görə, Azər 5 yaşı olanda həyətdə yıxılıb və başı daşa dəyib, Dəfələrlə Lənkəran, Lerik rayonlarında və Respublika Psixiatriya Xəstəxanasında müalicə olunub.
Gəncə Ağır Cinayətlər Məhkəməsinin hökmü ilə Azər Cinayət Məcəlləsinin 29, 120.2.4-cü maddəsində nəzərdə tutulmuş cinayət əməlini anlaqsız vəziyyətdə törətdiyindən cinayət məsuliyyətindən azad edilib. Onun barəsində Cinayət Məcəlləsinin 95.0.3-cü maddəsinə uyğun olaraq ixtisaslaşdırılmış psixiatriya stasionarında məcburi müalicə şəklində tibbi xarakterli məcburi tədbir tətbiq edilib.
