Bu gün tanınmış aktyor, rejissor, Azərbaycan Respublikasının Əməkdar İncəsənət Xadimi Zirəddin Məmmədtağı oğlu Tağıyevin doğum günüdür.
Gencexeber.az məlumat verir ki, 1943-cü il mayın 8-də Gəncə şəhərində dünyaya gələn Zirəddin Tağıyev Azərbaycan teatr və kino sənətinə əvəzsiz töhfələr verib. Teatra olan sevgisi onu hələ 17 yaşında doğma Gəncədən Bakıya aparıb. 1960-cı ildə aktyor olmaq arzusu ilə M.A. Əliyev adına Azərbaycan Dövlət Teatr İnstitutuna daxil olub və daha sonra Gənc Tamaşaçılar Teatrının səhnəsində parlaq çıxışlar edib.
Zirəddin Tağıyev "İki qardaş" tamaşasında 80 yaşlı qoca obrazını məharətlə canlandırıb. Sonradan Adil İsgəndərovun dəvəti ilə “Azərbaycanfilm” kinostudiyasında fəaliyyətə başlayıb, Moskvada ixtisasını artırıb və “Mozalan” kinojurnalında həm rejissor, həm də aktyor kimi çalışıb. Bu illər ərzində 100-dən artıq xarici filmə Azərbaycan dilində yeni nəfəs verib.
1990-cı illərin əvvəllərində doğma səhnəyə — Gəncə Dram Teatrına qayıdıb, burada yeni tamaşalar səhnəyə qoyub, sonra isə Bakıya dönərək poeziya teatrı layihəsinə rəhbərlik edib. Bakı Bələdiyyə Teatrındakı fəaliyyəti də bir çox uğurlu tamaşalarla yadda qalıb. Əziz Nesin, Fərman Məmmədov, İslam Kərimov və Abdulla Qurbaninin əsərlərinə quruluş verib.
Zirəddin Tağıyev 2019-cu il aprelin 9-da vəfat edib. Doğum günündə sənətkarı sevgi və ehtiramla anırıq.
