İslam dinində müqəddəs bayramlardan biri Qurban bayramıdır.
Gencexeber.az məlumat verir ki, Qurban bayramında qoyun, qoç, inək, dana və ya dəvə kəsilir. Qurbandan pay göndərilir, həmçinin ehtiyacı olanlara paylanılır.
Qurban bayramının yaranması İbrahim Peyğəmbərin həyatında baş verən əhvalatla bağlıdır. Allah Peyğəmbərə oğlu İsmayılı qurban verməyi əmr edir. İbrahim Allahın əmrini yerinə yetirməyə, İsmayıl isə qurban olmağa hazır idi. Lakin Allah İbrahim Peyğəmbərə bunu rəva bilmir və qurbanlıq üçün ona bir qoç göndərir. Nəticədə həmin qoç qurban kimi kəsilir.
Qurban bayramı bütün müsəlman ölkələrində qeyd olunur. Azərbaycan müstəqillik əldə etdikdən sonra 1992-ci il 27 oktyabr tarixli "Azərbaycan Respublikasının bayramları haqqında" Qanununa əsasən, Qurban bayramı ölkəmizdə dövlət səviyyəsində qeyd olunmağa başlayıb.
