Bu gün şəhid Rəhman Bayramov və Nağı Həşimovun doğum günüdür.
Gencexeber.az xatırladır ki, Rəhman Dilcan oğlu Bayramov 20 avqust 1993-cü ildə Gəncədə anadan olub. Göygöl rayon 8 mart qəsəbə tam orta məktəbini bitirib. 2012-ci ildə həqiqi hərbi xidmətə çağırılıb.
2020-ci ildə Füzuli və Xocavənd uğrunda gedən döyüşlərdə iştirak edib. Rəhman 9 noyabr 2020-ci ildə Xocavənd rayonu ərazisində gedən döyüşlərdə şəhidlik zirvəsinə yüksəlib. Şəhidimiz 28 dekabrda Gəncə şəhərinin Şəhidlər xiyabanında dəfn olunub.
Rəhman Bayramov ölümündən sonra "Vətən uğrunda", "Cəbrayılın azad olunmasına görə", "Xocavəndin azad olunmasına görə", "Füzulinin azad olunmasına görə" medalları və "Vətənə xidmətə görə" ordeni ilə təltif edilib.
Nağı Anar oğlu Həşimov 20 avqust 1998-ci ildə Gəncədə doğulub. 1 nömrəli tam orta məktəbdə oxuyub. 2013-cü ildə C.Naxçıvanski adına Hərbi Liseyə qəbul olub. 2015-ci ildə Heydər Əliyev adına Azərbaycan Ali Hərbi Məktəbində təhsil almağa başlayıb.
Həmin ildə tağım komandiri kimi xidmətə başlayıb. 27 sentyabr 2020-ci ildə başlayan savaşda leytenant kimi Azərbaycanın ərazi bütövlüyü uğrunda gedən döyüşlərdə iştirak edib. Nağı Həşimov sentyabrın 29-da Füzuli döyüşləri zamanı şəhid olub.
Şəhidimiz Prezident tərəfindən "Vətən uğrunda", "Xocavəndin azad olunmasına görə", "İgidliyə görə" medalları və "Vətənə xidmətə görə" ordeni ilə təltif edilib.
