Bu gün Azərbaycan Kinosu Günüdür.
Gencexeber.az məlumat verir ki, 2 avqust 1898-ci ildə fotoqraf Aleksandr Mişonun çəkdiyi "Bibiheybətdə neft fontanı yanğını", "Əlahəzrət Buxara əmirinin yolasalma mərasimi", "Qafqaz rəqsi" xronikal sənədli və "İlişdin" adlı bədii süjetlərinin nümayişi ilə Azərbaycanın kino tarixi başlayır.
Ümummilli lider Heydər Əliyevin 18 dekabr 2000-ci il tarixli Sərəncamı ilə 2 avqust - Azərbaycan Kinosu Günü kimi qeyd olunur.
Digər şəhərlər kimi Gəncənin də Azərbaycanın kino mədəniyyətində rolu olub. Burada bir çox tanınmış aktyor və rejissorlar anadan olub. Onlardan çoxu Azərbaycanın Xalq və Əməkdar aktyorları adına layiq görülüblər. Həmçinin Gəncədə və şəhərə yaxın ərazilərdə bir neçə filmlər lentə alınıb.
Gəncəli aktyor və aktrisalardan Adil İsgəndərovu, Şahmar Ələkbərovu, Ələddin Abbasovu, Əfrasiyab Məmmədovu, Məmmədrza Şeyxzamanovu, Amaliya Pənahovanı, Kübra Əliyevanı və başqalarını qeyd etmək olar. Gəncəli Fəraməz Məmmədov isə bir çox Azərbaycan filmlərinin operatoru olub.
Adil İsgəndərov, Şahmar Ələkbərov və Əfrasiyab Məmmədov rejissor kimi də fəaliyyət göstəriblər. Adil İsgəndərovun lentə aldığı "Əhməd haradadır?" filmi SSRİ-də ən çox nümayiş olunan və pul qazandıran ekran əsərlərindən biridir. Şahmar Ələkbərov isə ən yaxşı bədii filmə görə Azərbaycan SSR dövlət mükafatı alıb. Həmçinin çəkilişləri Gəncədə aparılan "Qanun naminə", "Mən ki gözəl deyildim", "Cavad xan" və digər filmləri qeyd etmək olar.
