Gəncədə beynəlxalq turnirlərdə uğurlu nəticələr əldə edən idmançı və məşqçilərlə görüş keçirilib. Bu haqda 6 sentyabr tarixində Regional Gənclər və İdman idarəsinə istinadən məlumat veririk.
Tədbirdə Gəncə-Daşkəsən Regional Gənclər və İdman İdarəsinin rəisi İntiqam Hüseynov idmançıları təbrik edib və gələcək yarışlarda onlara uğurlar arzulayıb. O, hər zaman idmançılara dəstək olmağa çalışdıqlarını bildirib.
Daha sonra Meksikanın Mexiko şəhərində keçirilən Para-taekvondo üzrə Dünya çempionatında I yerə sahib olmuş İmaməddin Xəlilov və onun məşqçi-müəllimi Arif Xəlilov, Almaniyanın Berlin şəhərində keçirilən ümumdünya xüsusi Yay Olimpiya Oyunlarında Pauerliftinq (Ağırlıqqaldırma) üzrə III yeri tutmuş idmançılarımız Samir Eminov, Qədim Abbasov və onun məşqçi-müəllimi Natik Əliyev, Kikboksinq üzrə Dünya kubokunda III yerə layiq görülən Fuad Zeynalov, Avropa çempionatında III yerə çıxan Taleh Bayramov və məşqçi müəllimləri Talıb Bayramov və Əməkdar məşqçi, Gəncə Regional idarəsinin baş məşqçisi İlqar Alıyev təşəkkürnamələrlə təltif olunublar.
İdmançılar göstərilən diqqət və qayğıya görə idarə rəhbərliyinə minnətdarlıqlarını bildiriblər və gələcəkdə bundan da yüksək nəticələr əldə edəcəklərinə söz veriblər. Sonda idmançılarla xatirə şəkli çəkdirilib.
