Gəncənin Nəriman Nərimanov prospektində yerləşən binalardan birinin həyətində asfaltlanma işlərinin natamam həyata keçirilməsi ilə bağlı şikayətə Gəncə Şəhər İcra Hakimiyyəti münasibət bildirib.
Gencexeber.az-a daxil olan şikayətdə sakinlər qeyd ediblər ki, ətraf binaların həyətləri tam asfaltlansa da, onların yaşadığı binanın həyətində işlər yarımçıq qalıb. Şirkət rəsmiləri isə sakinlərə bildirib ki, onlara verilən tapşırıq çərçivəsində işləri tamamlayıblar və əlavə işlər görmək səlahiyyətlərində deyil.
Məsələ ilə bağlı redaksiyamız tərəfindən Gəncə Şəhər İcra Hakimiyyətinə sorğu ünvanlanıb. Qurumun Mətbuat Xidmətindən verilən cavabda bildirilib ki, işlərin natamam görülməsi hava şəraiti ilə bağlıdır.
“Sözügedən binanın həyətində aparılan işlər hələ tam başa çatdırılmayıb. Gəncə şəhərində müşahidə olunan yağıntılı hava şəraiti ilə əlaqədar olaraq, hazırda şəhər daxilindəki avtomobil yollarında və çoxmənzilli yaşayış binalarının həyətlərində görülən təmir-tikinti işləri müvəqqəti olaraq dayandırılıb. Hava şəraiti əlverişli olduqda işlərə yenidən başlanacaq” – Gəncə Şəhər İcra Hakimiyyətindən bildirilib.
