Gəncənin Bağmanlar küçəsində qəza şəraiti yaranıb.
Gencexeber.az-a daxil olan çoxsaylı şikayətlərə əsasən, problem Bala Bağman yaşayış massivində müşahidə olunur. Sakinlərin sözlərinə görə, bir neçə gün əvvəl yol qazılaraq yaşayış evlərindən birinə kanalizasiya xətti çəkilib. Daha sonra yaranan çuxur torpaqla örtülsə də, yol əvvəlki vəziyyətinə qaytarılmayıb.
Yağan yağışdan sonra həmin hissədə iri çuxur daha da dərinləşib. Bu isə həm sürücülər, həm də piyadalar üçün təhlükə yaradır. Avtomobillər çuxurdan yayınmaq üçün əks istiqamətə çıxmağa məcbur qalırlar. Nəticədə yolda qəza riski artır.
Sakinlər və sürücülər aidiyyəti qurumlardan problemin qısa zamanda aradan qaldırılmasını xahiş edirlər.
Qeyd edək ki, Bağmanlar küçəsindən keçən yol hazırda Gəncədən Daşkəsən istiqamətinə aparan əsas yollardan biri kimi istifadə olunur. Buna səbəb Təbriz küçəsində yol örtüyünün bərbad vəziyyətdə olmasıdır.
