2025-ci ildə Azərbaycanda cinayət törətmiş şəxslərin sayı 21 min 31 nəfər olub. 2024-cü ildə bu göstərici 22 min 485 nəfər təşkil edib. Beləliklə, bir il ərzində cinayət törətmiş şəxslərin sayı 1454 nəfər və ya 6,5 faiz azalıb.
Dövlət Statistika Komitəsinin məlumatına görə, 2025-ci ildə cinayət törətmiş şəxslərin 19 min 694 nəfəri kişi, 1337 nəfəri qadın olub.
Əvvəlki illə müqayisədə cinayət törətmiş kişilərin sayı 1556 nəfər və ya 7,3 faiz azalıb. Qadınların sayı isə 102 nəfər və ya 8,3 faiz artıb. Ümumilikdə, cinayət törətmiş şəxslərin 93,6 faizini kişilər, 6,4 faizini qadınlar təşkil edib.
Yaş qrupları üzrə ən yüksək göstərici 30 yaş və yuxarı şəxslər arasında qeydə alınıb. 2025-ci ildə cinayət törətmiş şəxslərin 2809 nəfəri 25-29, 2294 nəfəri 18-24, 344 nəfəri 16-17, 134 nəfəri isə 14-15 yaş qrupuna aid olub.
Məşğulluq vəziyyətinə görə, cinayət törətmiş şəxslərin 10 min 856 nəfərini əmək qabiliyyətli yaşda olub işləməyən və təhsil almayanlar təşkil edib. Bu kateqoriya üzrə göstərici bir il ərzində 1654 nəfər və ya 13,2 faiz azalıb.
Cinayət törətmiş şəxslər arasında digər məşğulluq növləri üzrə çalışanların sayı 8591, fəhlələrin sayı 878, qulluqçuların sayı isə 421 nəfər olub. Bundan başqa, 219 sahibkarlıq fəaliyyəti ilə məşğul olan, 28 təhsil alan, 24 kənd təsərrüfatı işçisi, 8 maliyyə-kredit və bank işçisi, eləcə də 6 dövlət idarəçiliyi sistemində çalışan şəxs cinayət törədib.
