Gəncədə universitetlərdən birində təyinat olub. Bu haqda 4 sentyabr tarixində ATU-ya istinadən məlumat veririk.
Azərbaycan Texnologiya Universitetinin İnsan resursları şöbəsinə müdir təyin edilib. Bu vəzifə İlham Əlizadəyə həvalə olunub.
İlham Hacıbaba oğlu Əlizadə 30 may 1958-ci ildə Gəncədə anadan olub. 1980-ci ildə Gəncə Dövlət Universitetini (GDU) tarix ixtisası üzrə bitirib. 1998-ci ildə Bakı Dövlət Universitetində (BDU) hüquqşünaslıq ixtisası üzrə ikinci təhsilini başa vurub.
1984-cü ildən dövlət qurumlarında və sənaye müəssisələrində çalışıb. Gəncə şəhər İcra Hakimiyyəti Aparatında müxtəlif vəzifələrdə (mütəxəssis, baş məsləhətçi, şöbə müdiri, İcra Hakimiyyəti Başçısının birinci müavini), Gəncə şəhər Kəpəz və Nizami bələdiyyələrində hüquq şöbəsinin müdiri vəzifəsində işləyib.
Həmçinin BP Azərbaycan şirkətinin məsul şəxsi, Cənubi Qafqaz Boru Kəmərinin Genişləndirilməsi Layihəsində baş koordinator, son dövrlərdə isə “Simurq Kompani” Səhmdar Cəmiyyətində hüquq və insan resursları şöbəsinin müdiri olub.
İlham Əlizadə 2022-ci ildə tarix üzrə fəlsəfə doktoru elmi dərəcəsinə layiq görülüb.
