Gəncədə uşaqlara viruslara qarşı peyvəndlər vurulur. Bu haqda 29 sentyabr tarixində Kəpəz televiziyasına istinadən məlumat veririk.
Payız mövsümündə bir sıra xəstəliklərin yayılması səbəbindən Ailə Sağlamlıq Mərkəzlərində uşaqlara vaksinlərin vurulmasına başlanılıb. Hazırda proses şəhər ərazisində 9 ASM-də aparılır. Sözügedən mərkəzlər üzrə qeydiyyatda olan uşaqların sahə həkimləri tərəfindən sağlamlıqları da yoxlanılır. Müayinənin nəticəsinə uyğun olaraq, peyvəndin vurulması tövsiyə edilir.
Peyvəndləmə immuniteti artıraraq xəstəliklər üçün təbii müdafiə yaradır. Vaksin virusa yoluxma ehtimalını azaldır və xəstəliyi yüngül keçirməyi təmin edir. Xüsusilə havaların soyuması uşaqlarda qrip, göy öskürək, qızılca, məxmərək kimi yoluxucu xəstəliklərə yoluxma riski yaratdığı üçün aparılan peyvəndləmənin əhəmiyyəti vurğulanır.
