“Bizim tanınmış yazıçılarımız, ziyalılarımız hesab edirdilər ki, bizim dilimizin adı "Türk dili" yazılmalıdır. Mən bir dəfə mətbuatda çıxış edib demişdim ki, "doğrudur, etnik cəhətdən türkük, ancaq bizim dilimiz Azərbaycan dilidir". Mənim üstümə bir səs-küy qaldırdılar. Bir qadın var - adını deməyəcəm, indi də deputatdır, əsaslı dəlil gətirə bilmirdi, dedi ki, bunun anası ermənidir”.
Bu sözləri modern.аz-a müsahibəsi zamanı Azərbaycan Respublikası Milli Məclisinin sabiq deputatı, Yeni Azərbaycan Partiyası Veteranlar Şurasının sədri Arif Rəhimzadə deyib.
Sabiq deputat 1993-cü ildə Gəncədə baş verən qarşıdurmalara da toxunub. O qeyd edib ki, 1993-cü ildə Gəncədə baş verən qarşıdurmaların səbəbi o dövrkü iqtidarın səriştəsizliyi olub:
“Gəncə hadisələri o vaxtki rəhbərliyin məsuliyyətsiz qərarları ilə bağlı idi. Sürət Hüseynov hərbi sahədən xəbəri olmayan, lakin maliyyə imkanları hesabına güc toplamış bir şəxs idi. O, sonradan iqtidarla ziddiyyətə düşdü və özünə sadiq hərbi kontingent yaratdı. Hətta ‘Bakıya gəlib Prezident Aparatının qarşısında dar ağacı quracağam’ deyə bəyanat verirdi”.
Rəhimzadə həmin dövrdə YAP üzvü kimi yaranan vəziyyətə biganə qalmadıqlarını və Gəncəyə ezam olunduqlarını bildirib:
“Ciddi qan tökülmüşdü. Gəncədə narazılıq var idi, amma əhalinin böyük hissəsi Heydər Əliyevin tərəfində idi. Biz camaatla görüşdük, vəziyyəti Prezidentə məruzə etdik. Parlamentin iclasında çıxış etdikdən sonra təzyiqlərlə üzləşdik, binadan çıxmaq belə mümkün deyildi.”
Onun sözlərinə görə, Sürət Hüseynovun tərəfdarları hakimiyyəti ələ keçirmək istəyirdilər. Lakin xalqın tələbi ilə Heydər Əliyev səhnəyə gəldi:
“İyunun 15-də Heydər Əliyev Milli Məclisin sədri seçildi. 10 gün sonra Elçibəy Bakını tərk etdi və hakimiyyət faktiki olaraq Heydər Əliyevə keçdi. Gəncə hadisələri göstərdi ki, xalq sabitliyi, idarəçiliyi və dövlətçiliyi dəstəkləyir”.
Ermənistan-Azərbaycan münaqişəsinə toxunan Arif Rəhimzadə bildirib ki, 30 il işğal altında olan ərazilər azad edilsə də, Qərbin ölkəmizə qarşı qərəzli münasibəti davam edir:
"Dağlıq Qarabağ" adlı qurum ləğv olunub, bu, BMT qətnamələrində də təsbit olunub. Amma yenə də bizə qarşı ittihamlar səsləndirilir. Bu, beynəlxalq hüququn iflasıdır. Azərbaycanın apardığı siyasət beynəlxalq hüquqa əsaslanır və gec-tez bu reallıq qəbul olunacaq”.
