Gəncədə iki müəssisədə nöqsanlar aşkarlanıb. Bu haqda 4 oktyabr tarixində AQTA-ya istinadən məlumat veririk.
Azərbaycan Respublikasının Qida Təhlükəsizliyi Agentliyi əməkdaşları şəhər ərazisində yerləşən ticarət və ictimai iaşə müəssisələrinə baxış keçiriblər. Nəticədə iki obyektdə nöqsanlar aşkarlanıb:
- "Şahmar" market (Cavadxan küçəsi, 17, mənzil 363 ünvanında) - qida təhlükəsizliyi qeydiyyatına dair çıxarışın olmaması, obliqat qrupuna daxil olan işçilərin ilkin və dövri tibbi müayinədən keçməməsi;
- "Happy Fermer" kənd təsərrüfatı məhsulları satışı mağazası (Təbriz küçəsi, ev 94/1 ünvanında) - qida təhlükəsizliyi qeydiyyatına dair çıxarışın olmaması, obliqat qrupuna daxil olan işçilərin ilkin və dövri tibbi müayinədən keçməməsi, baytarlıq şəhadətnaməsi və ya arayışı olmayan heyvan mənşəli məhsulların qəbulu, açıq şəkildə satışı həyata keçirilən məhsullara qoyulan tələblərdə uyğunsuzluq.
Nöqsanların aradan qaldırılması üçün icrası məcburi göstərişlər verilib.
