Gəncəli basketbolçu millidə çıxış edib. Bu haqda 7 iyun tarixində Basketbol Federasiyasına istinadən məlumat veririk.
Söhbət “Gəncə” BK-nın kapitanı Amil Həmzəyevdən gedir. Basketbolun 3-ə 3 növü üzrə Avropa çempionatı start götürüb. Burada ölkəmizi təmsil edənlər arasında Həmzəyev də yer alıb.
Komandamız bütün rəqiblərini məğlub edərək adını Avropa çempionatının final mərhələsinə yazdırıb. Kişilərdən ibarət millimiz Kiprin Limassol şəhərində keçirilən Avropa çempionatının seçmə mərhələsində yarımfinal oyununu keçirib. Lüksemburq basketbolçuları ilə qarşılaşan komandamız oyundan 15 - 13 hesabı ilə qalib ayrılaraq adını turnirin finalına yüksəldib.
Son mərhələdə millimiz İrlandiya komandası ilə qarşılaşıb və meydançadan 20 - 16 hesabı ilə qalib ayrılıb. Bu nəticələrdən sonra yığma komandamız 9 - 11 sentyabr tarixlərində Avstriyanın Qratz şəhərində baş tutacaq Avropa çempionatının final mərhələsinə vəsiqə qazanıb.
