Göygöl rayonunda yanğın baş verib.
Gencexeber.az məlumat verir ki, şəhərin Məhəmməd Əmin Rəsulzadə küçəsində almanlar tərəfindən tikilən tarixi evlər yanıb. Bir həyətdə yerləşən və bir-birinə bitişik evlərdən birində anidən başlayan yanğın qısa müddətə yaxınlıqdakı digər 3 evə yayılıb.
Hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin Göygöl Rayon Dövlət Yanğından Mühafizə Hissəsinin yanğınsöndürən avtomobilləri və şəxsi heyəti cəlb olunub. Yanğınsöndürənlərin operativ müdaxiləsi nəticəsində alovun geniş əraziyə yayılmasının qarşısı alınıb.
Məlumata görə, ümumi sahəsi 520 kvadratmetr olan bir-birinə bitişik 4 evin 350 kvadratmetri yanıb. Evlərin qalan hissəsi və ətraf tikililər yanğından mühafizə olunub.
İlkin məlumata əsasən, hadisə zamanı xəsarət alan olmayıb.
Faktla bağlı araşdırma aparılır.
