Goranboy rayonunda ölümlə nəticələnən ağır yol-nəqliyyat hadisəsinin başvermə səbəbinə dair ehtimal irəli sürülüb.
Gencexeber.az-a Daxili İşlər Nazirliyindən (DİN) verilən məlumata görə, iyunun 8-i saat 13:00 radələrində, Goranboy rayonunun Səmədabad kəndi ərazisində 73 yaşlı Səməndər Cəfərovun idarə etdiyi "VAZ-2107" markalı avtomobil əks istiqamətli hərəkət zolağına çıxaraq, həmyerlisi, 86 yaşlı Şahbaz Qarayevin idarə etdiyi "VAZ-2106" markalı avtomobillə toqquşub.
Ehtimallara görə, hadisəyə Səməndər Cəfərovun sükan arxasında yuxulaması səbəb olub.
Qeyd edək ki, qəza nəticəsində Şahbaz Qarayev, eləcə də Səməndər Cəfərovun sərnişini Rza Qasımov hadisə yerində həyatlarını itirib.
"Sözügedən yol-nəqliyyat hadisəsi zamanı "VAZ-2107" markalı avtomobilin sürücüsünün sükan arxasında yuxulaması ehtimal olunur. Faktla bağlı araşdırma aparılır.
Baş Dövlət Yol Polisi İdarəsi yorğun, yuxusuz və ya səhhətində problem olan şəxslərin sükan arxasında əyləşməsi səbəbindən dəfələrlə ağırlıq dərəcəsi yüksək olan yol-nəqliyyat hadisələrinin törədildiyini bir daha təəssüflə qeyd edir, sürücülərə müraciət edərək onları belə hallardan çəkinməyə, özlərinin və digər hərəkət iştirakçılarının təhlükəsizliyinə, həyat və sağlamlığına biganə yanaşmamağa çağırır", – DİN-dən bildirilib.
