Son dövrlərdə körpə quzuların aşağı çəkidə kəsilərək satışa çıxarılması heyvandarlıqla məşğul olan sahibkarlar arasında narahatlıq yaradan məsələlərdən birinə çevrilib. Belə ki, sahibkarlar bildirirlər ki, quzuların 7-8-9 kiloqram çəkidə kəsilməsi həm təsərrüfatların əldə edə biləcəyi gəlirin azalmasına, həm də heyvandarlığın gələcək inkişafına mənfi təsir göstərə bilər.
Mövzu ilə bağlıdanışan kənd təsərrüfatı eksperti Vahid Məhərrəmov bildirib ki, bu məsələyə emosional deyil, iqtisadi və təsərrüfat baxımından yanaşmaq lazımdır.
Onun sözlərinə görə, söhbət 7-8 kiloqramlıq deyil, təmiz çəkisi 9-10 kiloqram olan quzulardan gedir:
"Bu da diri çəkidə təxminən 16-17 kiloqram edir. Bu quzuların kəsilməsi Azərbaycanda yem çatışmazlığı ilə bağlıdır. Azərbaycanda yem təminatı ilə bağlı ciddi problem var. Belə olan halda heyvanlar çəki almır, əksinə arıqlayır. Quzular südəmər dövrdə və az miqdarda yemlə qısa müddətdə yüksək çəki əldə edir. Sonrakı mərhələdə isə həm fiziki durumunu saxlamaq, həm də ət çəkisini artırmaq üçün daha çox yem tələb olunur".
"Əvvəllər də 9-10 kiloqram təmiz çəkidə quzular kəsilirdi və buna geniş tələbat var idi. Hətta imkanlı şəxslər, oliqarx məmurlar daha çox məhz 8-10 kiloqramlıq quzu ətinə üstünlük verirdilər. Çünki bu ətin kiloqramı 25-30 manat arasında satılırdı.
Bəzən bu mövzu elə təqdim edilir ki, guya quzunun bu yaşda kəsilməsi düzgün deyil. Bu, manipulyasiyadır və yanlış yanaşmadır. Heyvandarlıqla məşğul olan insanlar heç də qəddar deyillər. Onlar saxladıqları heyvanlara böyük qayğı göstərirlər, onları özlərinə əziz bilirlər. Sadəcə məcburiyyət qarşısında qalaraq kəsimə verirlər. Çünki satılan quzunun hesabına qalan heyvanların yemini təmin edirlər və yeni heyvan alırlar. İndiki şəraitdə vəziyyət həqiqətən çox çətindir", - deyə ekspert bildirib.
Mənbə: modern.аz
