Gəncədə bir sıra valideyn və müəllimləri narahat edən hadisə yaranıb. Bu haqda Gencexeber.az-a 6 sentyabr tarixində məlumat daxil olub.
Sözügedən hal şəhərin 4 nömrəli xarici dil təmayüllü məktəb-liseyində müşahidə olunur. Burada yeni dərs ilində V və VI siniflərdə təhsil alacaq şagirdlərin dərsləri günorta növbəsinə salınıb. Bu da valideyn və müəllimlərin narazılığına səbəb olub. Onlar redaksiyamıza müraciət edərək bildiriblər ki, dərslərin növbəsinin dəyişməsi əsassızdır və övladlarının məktəbə səhər getməsini istəyirlər.
Məsələ ilə bağlı məktəb-liseyin direktoru Əliağa Səfərəliyev ilə əlaqə saxladıq. Aldığımız məlumata əsasən, təhsil müəssisəsi 3 tədris korpusundan ibarətdir. Burada 119 sinif otağı yerləşir. Hazırda məktəbdə 107 sinif təhsil alır.
“Təhsil müəssisəsində ingilis, fransız, rus bölməsi üçün Azərbaycan dilləri və STEAM dərsləri bölgülü şəkildə keçirilir. Hər sinif iki hissəyə ayrılır. Bunun üçün təxmini 30-35 sinif otağı tələb olunur. Məktəbin ümumi tutumu 1890 yerlikdir. Lakin burada 3300-dən artıq şagird təhsil alır.
İyun ayında pedaqoji şura keçirilən zaman bildirmişdim ki, yeni tədris ilində V və VI sinifləri ikinci (günorta) növbəyə keçirməyə zərurət yaranır. Bu rejimə şuranın qərarı ilə keçilib. Məsələ ilə bağlı Regional Təhsil idarəsinə də məlumat verilib”, - deyə Səfərəliyev açıqlamada bildirib.
