Gənc rejissor eksperimental teatr layihəsi həyata keçirir.
Gencexeber.az məlumat verir ki, Azərbaycan Dövlət Mədəniyyət və İncəsənət Universitetinin 4-cü kurs tələbəsi olan Rəvan Hüseynzadə özünün qurucusu və rejissoru olduğu “İnstinkt” Teatrını təsis edib.
Bakı şəhərində yerləşən “İnstinkt” Teatrı — ənənəvi teatr dili ilə kifayətlənməyən, instinktlərlə düşüncənin sərhədində yeni bədii formalar axtaran bir növ “laboratoriyadır”. Teatrın yaradılmasında əsas məqsəd tamaşaçı ilə sənət arasında fərqli təmas nöqtəsi yaratmaqdır.
Teatrın ilk premyerası olan “ARqon” tamaşası bu yaxınlarda artıq təqdim olunub. Əsərin müəllifi — gənc yazar Şəbnəm Xeyrulla, səhnələşdirmə və rejissura isə Rəvan Hüseynzadəyə məxsusdur.
Gənc rejissor yaxın gələcəkdə daha bir neçə tamaşa layihəsini gerçəkləşdirməyi və “İnstinkt” teatrını çağdaş sənət axtarışlarının fəal bir mərkəzinə çevirməyi planlaşdırır.
Qeyd edək ki, Rəvan Hüseynzadə 2002-ci ildə Gəncə şəhərində dünyaya göz açıb. Gəncə şəhər M.Füzuli adına 22 nömrəli tam orta məktəbi bitirib.
