Göygöl rayonunun Nadil kəndinin əhalisi uzun illərdir yol problemindən əziyyət çəkir.
Gencexeber.az məlumat verir ki, kəndin girişindən başlayan avtomobil yolu baxımsızlıq səbəbindən tamamilə yararsız vəziyyətə düşüb.
Sakinlərin sözlərinə görə, sovet dövründə çəkilən yol illər ərzində təmir edilmədiyindən dağılıb və hazırda hərəkət üçün ciddi çətinliklər yaradır.
Vətəndaşlar problemin həlli ilə bağlı aidiyyəti qurumlara dəfələrlə müraciət etsələr də, nəticə dəyişməyib. Onların sözlərinə görə, hər dəfə yolun təmir olunacağı bildirilsə də, indiyədək real addım atılmayıb.
Yolun bərbad vəziyyətdə olması hətta kəndə təcili tibbi yardım avtomobillərinin gəlişini də çətinləşdirir.
Hazırda Nadil kəndində təxminən 1500 ailə yaşayır. Problemdən aidiyyəti qurumların da xəbəri var.
Göygöl Rayon İcra Hakimiyyətindən bildirilib ki, yolun təmiri ilə bağlı Azərbaycan Avtomobil Yolları Dövlət Agentliyinə məlumat verilib. Problemin aradan qaldırılması istiqamətində tədbirlərin görüləcəyi qeyd olunub.
