Gəncə Dövlət Milli Dram Teatrının Ədəbi-hissə müdiri, teatrşünas-tənqidçi Anar Ərtoğrul Burcəliyev "Simurq 2025 Awards Azerbaijan" mükafatına layiq görülüb.
Gencexeber.az-ın məlumatına görə, o, bu mükafata 2025-ci il ərzində dövrü mətbuatda nəşr olunan məqalə, resenziya, oçerk və müsahibələrinə, həmçinin "Milli mədəniyyət tariximiz Heydər Əliyev ideyalarında" kitabına görə təltif edilib.
A.Ərtoğrul Burcəliyev bundan öncə də "Simurq 2021 Awards Azerbaijan" və "Simurq 2023 Awards Azerbaijan" mükafatlarına da layiq görülüb. O, dövrü mətbuatda 450-dən artıq məqalə, resenziya, oçerk və müsahibələrin, eləcə də 22 kitabın müəllifidir.
Qeyd edək ki, "Simurq 2025 Awards Azerbaijan" mükafatı "Fortuna Media" MMC tərəfindən təsis olunub və hər il keçirilən sorğu əsasında təqdim edilir. Bu mükafat öz sahəsində aktiv və uğurlu fəaliyyət göstərən şəxslərə onların il ərzində media və sosial şəbəkələrdə apardıqları fəaliyyətin müşahidələrinə əsasən verilir.
