Gənc vokal ifaçısı Altun Süleymanovun "Solo gənclik" layihəsi çərçivəsində solo konserti baş tutub.
Gencexeber.az məlumat verir ki, tədbir Maestro Niyazinin Mənzil-Muzeyində təşkil olunub. Azərbaycan Respublikası Mədəniyyət Nazirliyi, "İRƏLİ" İctimai Birliyi və Azərbaycan Musiqi Mədəniyyəti Dövlət Muzeyinin birgə reallaşdırdığı "Solo Gənclik" layihəsi çərçivəsində gəncəli opera-vokal ifaçısı, Respublika və Beynəlxalq müsabiqələr laureatı Altun Süleymanov solo konsert proqramı ilə çıxış etdi.
Gənc ifaçını səhnədə Azərbaycan Milli Konservatoriyasının pedaqoqu, təcrübəli konsertmeyster Rəhimə Qurbanova piano ilə müşayiət edib.
Layihənin əsas məqsədi gənc ifaçıların səhnədə öz yaradıcılıq potensialını nümayiş etdirməsi, yeni istedadların kəşfi və mədəniyyətə yaradıcı nəfəs gətirən sənətçilərin geniş auditoriyaya təqdim olunmasıdır. Proqram zamanı dinləyicilərə klassik opera, romans, xalq mahnıları və dünya musiqi irsindən ibarət geniş repertuar təqdim edilib.
İzləyənlər arasında tanınmış mədəniyyət və ictimai xadimləri olublar. Azərbaycan Milli Konservatoriyasının dosenti, opera-vokal ifaçısı Mahirə Həsənova, Gəncədən xüsusi olaraq tədbirə qatılaraq həmyerlisinə dəstək olan Milli Məclisin deputatı Pərvin Kərimzadə, Dünya Azərbaycanlıları Mədəniyyət Mərkəzinin prezidenti Rasim Məmmədov, "Dodo" qəzetinin baş redaktoru, jurnalist İradə Məlikova, "İRƏLİ" İctimai Birliyinin katibi Riad Cəbrayılov və Mirvarid Dilbazi Poeziya Məclisinin sədri Güllü Eldar Tomarlı gənc vokalçı haqqında xoş fikirlərini bölüşdülər.
Tədbirin sonunda DAMM və "Sabirlik və İnkişaf" İctimai Birliyi tərəfindən Altun Süleymanov və konsertmeyster Rəhimə Qurbanovaya ALİ DİPLOM "Dodo" qəzeti tərəfindən isə Tərif və Təşəkkür Diplomu təqdim edilib.
