Serbiyanın Novi Sad şəhərində keçirilən Pankration və MMA növləri üzrə Dünya çempionatında Gəncə şəhərinin nümayəndəsi, MMA üzrə məşqçi-müəllim Xəyal Əmrahov hakim qismində çıxış edərək Azərbaycanı layiqincə təmsil edib.
Gencexeber.az-ın məlumatına görə, beynəlxalq arenada uğurla fəaliyyət göstərən gəncəli mütəxəssisin bu nailiyyəti Gəncə idman məktəbi üçün də qürurverici hadisə hesab olunur. Bu münasibətlə Gəncə–Daşkəsən Regional Gənclər və İdman İdarəsinin rəisi Elvin Quliyev Xəyal Əmrahovla görüş keçirib. Görüş zamanı idarə tərəfindən Əmrahovun beynəlxalq yarışdakı fəaliyyətinə görə ona Fəxri Fərman təqdim olunub.
Elvin Quliyev çıxışında qeyd edib ki, gəncəli məşqçilərin və idman mütəxəssislərinin beynəlxalq yarışlarda ölkəmizi yüksək səviyyədə təmsil etməsi Azərbaycan idmanının inkişafına mühüm töhfədir. O, Xəyal Əmrahovu əldə etdiyi uğura görə təbrik edərək, gələcək fəaliyyətində yeni nailiyyətlər arzulayıb.
