Gəncə üçün yazılan hər bir səmimi misra bu şəhərə olan sevginin bariz nümunəsidir. Bu dəfə belə bir nümunə 17 yaşlı gənc istedaddan gəlib.
Gencexeber.az məlumat verir ki, 17 yaşlı Rəşad Səbuhi oğlu Xeyirxəbərov hazırda Gürcüstanda tibb universitetində təhsil alır. Gəncə şəhəri 1 nömrəli tam orta məktəbin məzunu olan gənc, yaşının az olmasına baxmayaraq, qələmə aldığı şeirlə diqqət çəkməyi bacarıb.
Rəşadın Gəncəyə həsr etdiyi şeir bu qədim şəhərə olan bağlılığı, doğma yurda sevgi və hörməti açıq şəkildə ifadə edir. Onun misralarında Gəncənin ruhu, tarixi və doğmalığı hiss olunur.
Şeiri təqdim edirik:
Kəpəz tək vüqarlı, ulu bir dağsan,
Nizami vaxtından qalan torpaqsan.
Tarixin köksündə sönməz çıraqsan,
Mənim can evimsən, canımsan, Gəncə.
Çinar kölgəsində yatar tarixin,
Uca qalalarda qalar tarixin.
Mərdlik kitabıdır hər bir tarixin,
Qeyrət sorağımsan, arımsan, Gəncə.
Hər daşın bir dastan, hər yerin cənnət,
Səndədir şərafət, səndədir hörmət.
Rəşad tək oğullar sənə əmanət,
Mənim iftixarım, şanımsan, Gəncə!
