Səfərabad məscidi Gəncənin qədim Səfərabad məhəlləsində, indiki Qəmbər Hüseynli və Nizami küçələrinin kəsişməsində yerləşib. İbadətgahın tikintisi XX əsrin əvvəllərinə təsadüf edir. İbadət evi Məhəmməd Hacı Əli oğlu, Məşədi Tağı Hacı Hüseynbaba oğlu, Hacı Ələkbər Məşədi Alı oğlu, Məşədi Cəbrayıl Haqverdi oğlu, Qəhrəman Haqverdi oğlu, Hüseyn Baba oğlunun təşəbbüsü ilə və məhəllə sakinlərinin vəsaiti hesabına inşa edilib. Məscidin ilk axundu Hacı Yaqub Baratzadə olub.
İbadətgahın ətrafında kiçik Səfərabad məhəlllə qəbiristanlığı mövcud olub. Hal-hazırda bu ərazidə park salınıb. Qəbiristanlığın yeganə sübutu isə Hacı Seyid Bağırın türbəsinin burada yerləşməsidir.
İbadətgah kiçik ölçüdə, düzbucaqlı formada olub. Məscidin günbəzi olmayıb. Alim Sədnik Paşayevin ehtimallarına görə, məscid qəbiristanlığa məxsus olub və ölüləri yumaq üçün istifadə edilib.
Sovet dövründə ibadət evinin fəaliyyəti dayandırılıb və məscid binası sökülüb. Hal-hazırda da məscid binası mövcud deyil.
Səfərabad məhəlləsində ümumilikdə üç məscid olub.
Mənbələr:
