Gəncədə sərnişin avtobusunda qeyri-adi və narahatedici hal qeydə alınıb.
Gencexeber.az-ın məlumatına görə, hadisə Gəncə–Göygöl avtomobil yolunda baş verib. Belə ki, Gəncə şəhəri Nəriman Nərimanov küçəsi – Göygöl Şəhər Mərkəzi Xəstəxanası marşrutu üzrə hərəkət edən "BakuBus" MMC-yə məxsus "G1" nömrəli avtobusun sürücüsü nəqliyyat vasitəsi hərəkətdə olarkən orta qapını açıq vəziyyətdə saxlayıb. Bu zaman şirkətin dispetçeri avtobusun içindən buz bağlamış yolun Göygöl şəhərinin girişinədək hərəkət hissəsinə duz səpib.
Hadisə şahidi olan sərnişinlərin sözlərinə görə, yolların buz bağlayacağı əvvəlcədən proqnozlaşdırıldığı halda, müvafiq kommunal qurumlar tərəfindən profilaktik tədbirlər görülməyib. Nəticədə belə təhlükəli vəziyyət yaranıb və məsuliyyət daşımalı olan strukturların funksiyasını avtobus heyəti icra etməyə məcbur qalıb.
Sərnişinlər bildiriblər ki, hava şəraitinin yaratdığı risklərə operativ reaksiya verilməməsi qəza ehtimalını artırır və insanların həyatını təhlükə altına atır. Bundan əlavə, yaranmış vəziyyət ictimai nəqliyyatda ciddi vaxt itkisinə də səbəb olub.
Vətəndaşlar məsələ ilə bağlı aidiyyəti qurumlar tərəfindən araşdırma aparılmasını, səhlənkarlığa hüquqi qiymət verilməsini və gələcəkdə bu kimi halların təkrarlanmaması üçün zəruri tədbirlərin görülməsini tələb edirlər.
