Qəsdən sağlamlığa ağır zərər vurmada təqsirləndirilən Tahir Həsənov və onun qeyri-rəsmi arvadı olan Turanə Rüstəmovanın barəsindəki qərardan verilən kassasiya şikayəti üzrə məhkəmə iclası başa çatıb.
Gencexeber.az-ın məlumatına görə, Tahir Həsənov 2022-ci ilin aprel ayından etibarən ər-arvad münasibətində yaşadığı Turanə Rüstəmova ilə birlikdə əvvəlcə Ağstafa rayonunun Ceyrançöl ərazisində, daha sonra Goranboy rayonunun Alpout kəndinin "Kərpicli" adlanan ərazidə yerləşən fermalarda çoban kimi işləyib.
İş materiallarından məlum olub ki, Tahir Həsənov həmin fermaların işlərini idarə edən və tez-tez fermaya gəlib-gedən qonşuları zərərçəkmiş Vasif Səmədovla Turanənin fermada intim münasibətdə olmasından şübhələnib. Elə bu məsələ ilə bağlı aralarında baş vermiş söhbət zamanı Turanə Vasiflə münasibətdə olduğunu etiraf edib və azyaşlı övladlarını götürərək birgə yaşadıqları ünvandan gedəcəyini bildirib. Ailəsinin dağılacağı və azyaşlı övladından məhrum olacağı düşüncəsi ilə hərəkət edən Tahir hadisədə Zakiri günahkar bilib və onu cəzalandırmaq istəyib.
Bu məqsədlə Tahir 2023-cü ilin aprelin 4-də Goranboy rayonunda yerləşən fermada nahar yeməyi gətirmiş Zakir Bədəlovu bıçaqlayıb. Bundan sonra azyaşlı övladının ağlaması səbəbindən Turanə onu bayıra çıxarıb. Həmin vaxt Tahir qapını arxadan bağlayaraq Zakirə yenidən xəsarət yetirməyə cəhd edib. Zakir Tahirin əlindəki bıçağın birini alaraq özünü qorumağa çalışıb. Tahirin qışqırıq səslərinə içəri girən Turanə hadisəyə qoşularaq Zakirin müqavimətini qırmaq üçün ona zərbələr endirib. Zərbələrin təsirindən müqaviməti qırılan Zakir çarpayının üzərinə yıxıldıqdan sonra Tahir və Turanə birlikdə, əllərindəki kəsici-deşici alətlərlə zərərçəkmiş şəxsin bədənin digər hissələrinə çoxsaylı zərbələr vurublar.
Gəncə Ağır Cinayətlər Məhkəməsinin hökmü ilə Tahir Həsənov 9 il, Turanə Rüstəmova isə 6 il müddətinə azadlıqdan məhrum edilib. Gəncə Apellyasiya Məhkəməsinin qərarı ilə birinci instansiya məhkəməsinin hökmü dəyişdirilmədən saxlanılıb, məhkumların apellyasiya şikayətləri, habelə dövlət ittihamçısının apellyasiya protesti təmin edilməyib.
Bundan sonra Turanə kassasiya şikayəti verərək, Gəncə Apellyasiya Məhkəməsinin qərarının ləğv edilməsini, ona daha yüngül cəza təyin olunmasını və ya Cinayət Məcəlləsinin 79-cu maddəsinə əsasən, uşağı on dörd yaşına çatanadək cəzasının çəkilməsinin təxirə salınması barədə qərar qəbul edilməsini xahiş edib. Ali Məhkəmə kassasiya şikayətini qəbul etməyib. Qeyd edək ki, adlar şərti verilib.
