Gəncə şəhər Abbas Səhhət adına xəstəxananın terapevti Rahilə Hüseyn qızı Mahmudova ilə bağlı redaksiyamıza şikayət daxil olub.
Gencexeber.az-a şikayət ünvanlayan pasiyentlər iddia edir ki, ümumiyyətlə sözügedən xəstəxanada sıra gözləmə mədəniyyəti yoxdur.
"Rahilə həkim sonuncu sırada olan pasiyenti öncədən qəbul edir. Hər dəfə də bəhanə edir ki, guya həmin xəstələr qazilərdir, şəhid ailələridir. Səhər 7-dən xəstəxanada olsan da, saat 11-də qəbula düşə bilmirsən. Amma məndən sonra gələnlər artıq qəbulda olublar, hətta çıxıb gediblər. Belə haqsızlıq, özbaşınalıq olmaz axı, 4 saat növbə gözləmək heç bir xəstəxanada yoxdur", - şikayətçilərdən biri deyib.
Məsələni aydınlaşdırmaq üçün Rahilə Mahmudova ilə əlaqə saxladıq.
Həkim sözügedən məsələnin yalan olduğunu bildirdi:
"Mən 50 ildir həkiməm, hələ heç bir xəstə məndən narazı qalmayıb. Bəli, bəzi pasiyentləri sıra gözləmədən qəbul edirik, onlar da şəhid ailələri və qazilər olur. Sadəcə bəzi xəstələr bu haldan narazı qaldıqları üçün yalan uydururlar. Heç bir pasiyent deyə bilməz ki, mən onun xətrinə dəymişəm, sərt cavab vermişəm. Özbaşıma xəstə qəbul etmirəm, qeyd etdiyim kimi bəzi kateqoriyadan olan xəstələr var ki, onlar sıra gözləmədən qəbul edilməlidir, mən də onu edirəm".
