Azərbaycanın qərb bölgəsində - Naftalanda doğulub, burada tədrisi Azərbaycan dilində aparılan yeganə məktəbdə - İ.Nəsimi adına Naftalan şəhər 1 nömrəli tam orta məktəbdə oxuyub. Gəncə Dövlət Universitetində "Kimya müəllimliyi" ixtisasını bitirib və cəmi bir neçə ildən sonra Azərbaycanın ən gənc qadın alimi adını qazanıb.
"Azərbaycan müəllimi"nin budəfəki qəhrəmanı Azərbaycanın ən gənc qadın alimi - kimya üzrə fəlsəfə doktoru, Elm və Təhsil Nazirliyinin akademik Y.H.Məmmədəliyev adına Neft-Kimya Prosesləri İnstitutunun böyük elmi işçisi Günay Heydərlidir.
Anası həkim olmağını arzulasa da, xəyalları onu müəllimliyə gətirib. Günay Heydərli 1 il Xocalı rayon Meşəli kənd orta məktəbində dərs deyib.
Kimyanın tədrisi onda yeni suallar yaradıb və qısa müddətdə anlayıb ki, onu düşündürən suallara yalnız elmin dərinliyinə dalaraq cavab tapa bilər: "Universitet illərində də kimyanın yalnız tədrisi deyil, onun elmi dərinliyi, mexanizmləri və tətbiq istiqamətləri diqqətimi çəkirdi. Buna görə təhsilimi davam etdirərək Azərbaycan Milli Elmlər Akademiyasında "Nanomateriallar kimyası" ixtisası üzrə magistr təhsili aldım".
Qərarını 2021-ci ildə doktoranturaya qəbul olaraq reallaşdırıb: "Gərgin və məqsədyönlü elmi fəaliyyət nəticəsində elmi-tədqiqat işlərimi vaxtından əvvəl yekunlaşdıraraq 2024-cü ilin aprelində dissertasiya işimi uğurla müdafiə etdim və Azərbaycan Respublikası Prezidenti yanında Ali Attestasiya Komissiyasının 18 fevral 2025-ci il tarixli qərarı ilə kimya üzrə fəlsəfə doktoru elmi dərəcəsinə layiq görüldüm".
30 yaşlı Günay Heydərli cəmi bir ildir ki, elmi dərəcə alıb, amma artıq bir sıra nüfuzlu beynəlxalq və yerli jurnallarda dərc olunmuş məqalələrin, patentlərin və monoqrafiyaların müəllifidir. Hazırda rəhbəri olduğu "Ekoloji təhlükəsiz katalitik sistemdə pirolizin yan məhsulları əsasında səmərəli kimyəvi əlavələrin alınması" adlı layihə Azərbaycan Elm Fondunun "Yaşıl dünya naminə həmrəylik ili"nə həsr olunmuş Əsas Qrant Müsabiqəsinin qalibi olub. 2024-cü ildə Azərbaycan Milli Elmlər Akademiyasının "İlin gənc alimi" diplomuna layiq görülüb
"Neft-Kimya Prosesləri İnstitutunun Gənc Alim və Mütəxəssislər Şurasının sədriyəm və Azərbaycan Dövlət Neft və Sənaye Universitetində magistratura səviyyəsində təhsil alan tələbələrə elmi rəhbərlik edirəm", - deyir.
Gələcək planları isə Azərbaycan sərhədlərini aşır: "Xaricdə elmi təcrübə və əməkdaşlıq planlarım var. Bunu hər alim üçün vacib hesab edirəm".
Amma hara getsə də, qayıdacağı yer vətəndir: "Azərbaycanda yaşamaq və elmimi burada tətbiq etmək mənim üçün prinsipial məsələdir. Hesab edirəm ki, beynəlxalq təcrübənin ölkəyə gətirilməsi və yerli elmi mühitin inkişafına töhfə verilməsi vacib və aktual məsələlərdən biridir".
.
