Gəncəli şahmatçı beynəlxalq turnirdə iştirak edəcək. Bu haqda 6 avqust tarixində Şahmat Federasiyasına istinadən məlumat veririk.
Sentyabrda Ümumdünya Şahmat Olimpiadasında iştirak edəcək qadın şahmatçılardan ibarət Azərbaycan milli komandası ilə görüş keçirilib. Burada Nizami yurdunun yetirməsi Ülviyyə Fətəliyeva da yer alıb.
Əvvəlcə şahmatçılar iştirak etdikləri axırıncı turnirlər haqda danışıblar. Ardınca kapitan Mixail Şereşevski və məşqçi Yevgeni Tomaşevski olimpiadaya hazırlığın son mərhələsi barədə fikirlərini bildiriblər.
Azərbaycan Şahmat Federasiyasının prezidenti Mahir Məmmədov təlim-məşqlərlə bağlı milli komandaya bundan sonra da lazımi şəraitin yaradılacağını deyib.
Görüş zamanı avqust ayı üçün nəzərdə tutulan hazırlıq planı və olimpiadayla bağlı digər məsələlər müzakirə edilib.
Qeyd edək ki, Ümumdünya Şahmat Olimpiadası 10-23 sentyabr tarixlərində Macarıstanda keçiriləcək.
