Gəncədə insan alveri ilə bağlı tədbir keçirilib. Bu haqda 31 mart tarixində Ailə, Qadın və Uşaq Problemləri üzrə Dövlət Komitəsinə istinadən məlumat veririk.
Tədbir Ailə, Qadın və Uşaq Problemləri üzrə Dövlət Komitəsi tərəfindən uşaq əməyinin istismarı və insan alveri qurbanı olmanın qarşısının alınması sahəsində qurumlararası işin təşkili məqsədilə baş tutub. Burada Gəncə, Mingəçevir, Goranboy, Göygöl və Yevlax Rayon İcra Hakimiyyətləri yanında Yetkinlik yaşına çatmayanların işləri və hüquqlarının müdafiəsi üzrə komissiyaların əməkdaşları, DİN-in Yetkinlik yaşına çatmayanlarla profilaktik işin təşkili üzrə inspektorları, rayon Polis İdarələrinin Post Patrul Xidmətinin Manqa Komandirləri, kiçik və orta bizneslə məşğul olan sahibkarlar iştirak ediblər.
QUPDK-nın əməkdaşı Şəbnəm Cəfərova iştirakçılara komitənin müvafiq sahədə həyata keçirdiyi tədbirlər barədə məlumat verib. Daha sonra Bakı Şəhər Baş Polis İdarəsi İctimai Təhlükəsizlik İdarəsinin polis polkovnik-leytenantı Kəmalə Ələkbərova və Hüquqi-Sosial Yardım və Maarifləndirmə İctimai Birliyinin rəhbəri Fariz Əkbərov çıxış ediblər.
Tədbirin sonunda iştirakçıları maraqlandıran suallar cavablandırılıb.
