Gəncədə uşaqlar üçün daha bir tibbi aksiya keçirilib. Bu haqda 2 iyun tarixində İcra Hakimiyyətinə istinadən məlumat veririk.
1 İyun - Uşaqların Beynəlxalq Müdafiəsi Gününə həsr edilmiş aksiya Dövlət Gömrük Komitəsinin Tibbi Xidmət İdarəsinin Mərkəzi Hospitalı tərəfindən Gəncə şəhərində yerləşən Gəncə Uşaq Evində valideyn himayəsindən məhrum olmuş uşaqlar üçün təşkil olunub. Burada Tibbi Xidmət İdarəsinin rəis müavini İsmayıl Əfəndiyev, icra başçısının müavini Adil Tağıyev, Uşaq Evinin direktoru, Qərb Ərazi Baş Gömrük İdarəsinin nümayəndələri, Mərkəzi Gömrük Hospitalının tibb heyəti iştirak ediblər.
Tədbirin rəsmi açılış hissəsindən sonra Gəncə Uşaq Evinin sakinləri bədii kompozisiya ilə çıxış edib, şeir deyib, mahnılar ifa edib, rəqs ediblər. Daha sonra İsmayıl Əfəndiyev narkotik vasitələrin və psixotrop maddələrin ziyanı, Mərkəzi Gömrük Hospitalının Təcili Tibbi Yardım şöbəsinin rəisi Nərgiz Kərimova ilk yardım qaydaları, Mama-ginekologiya şöbəsinin rəisi Təranə Bayramova qızlar üçün cinsi inkişaf və reproduktiv sağlamlıq, uşaq cərrahı Toğrul Piriyev oğlanlar üçün cinsi inkişaf və reproduktiv sağlamlıq, Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə sağlam həyat tərzinin təbliği və tütün istifadəsi ilə bağlı Uşaq Evinin müəllimləri, tərbiyəçiləri və sakinləri üçün təlimlər keçiriblər.
Mərkəzi Gömrük Hospitalının həkimləri Gəncə Uşaq Evində valideyn himayəsindən məhrum olmuş 100-ə yaxın uşağı kardioloji, oftalmoloji, travmatoloji, terapevtik və nevroloji müayinə ediblər, məsləhətlərini veriblər və hər birinə kitab hədiyyə olunub.
