Gəncədə Azərbaycan Texnologiya Universitetində təhsil alan tələbələr Qəbələ şəhərindəki Savalan Şərab Zavodunda baş tutan elmi seminarda iştirak ediblər. Bu haqda 24 aprel tarixində ATU-ya istinadən xəbər veririk.
Elmi seminar ATU-nun Qida mühəndisliyi fakültəsi və Tələbə Elmi Cəmiyyətinin Savalan Şərab Zavodu ilə birgə təşkil edilib. Seminar Qəbələ şəhərində “SAVALAN - ASPI Winery” Zavodunda baş tutub. Burada şərabçılıq ixtisasının tələbələrindən Səbinə Qasımova “Azərbaycanda şərabçılıq”, Aysel Cəfərova “Almaniyada şərabçılığın inkişaf tendensiyası”, Abulhəyat Süleymanlı “Azərbaycanda istehsal olunan konyaklar” mövzularında məruzələrlə çıxış ediblər.
Səfər çərçivəsində tələbələr zavodda texnoloji avadanlıqlar, onların iş prinsipi, laboratoriyalar və istehsal olunan məhsullarla yaxından tanış olublar.
