Gəncə sakinləri küçələrinin abadlaşdırılmasını istəyirlər. Bu haqda 29 aprel tarixində Real Tv-yə istinadən xəbər veririk.
Söhbət Gülüstan qəsəbəsinin Fəxrəddin Yusifov küçəsindən gedir. Burada sakinlər asfalt örtüyünün və işıqlandırılmanın olmadığından, küçənin adı ilə bağlı qeyri-dəqiqliklər və digər məsələlərdən narahatdırlar. Həmçinin ərazidə antisanitar vəziyyətin və zibil qutularının olmaması müşahidə edilir. Sakinlərin sözlərinə görə, yağış yağan kimi burada gölməçələr yarandığından hərəkət məhdudlaşır və yağış suları evlərə dolur, fövqəladə hal yaşanır.
“Yağış yağanda evimizi su basır. Məcbur FHN-in xilasetmə qüvvələrini çağırırıq, suyu çəkirlər”, - deyə məhəllə sakinləri bildiriblər. Onlar əlavə ediblər ki, analoji vəziyyətlə bağlı aidiyyəti qurumlara müraciətlər ediblər. Cavab olaraq bildirilib ki, layihədə Fəxrəddin Yusifov küçəsinin təmiri nəzərdə tutulmayıb.
Məsələ ilə bağlı Gəncə ŞİH-nin Mənzil Kommunal Təsərrüfat İstehsalat Birliyindən sözügedən küçədə olan çətinliklərdən xəbərdar olduqlarını bildirdilər. “Həmin küçələrə iritutumlu məişət tullantıları üçün qablar dəfələrlə yerləşdirilsə də, qabların götürülməsi vətəndaşlar tərəfindən tələb olunub. Biz yenidən həmin küçələrə, eyni zamanda ona paralel ərazilərə zibil qutularının yerləşdirilməsinə çalışarıq”, - deyə müdir müavini İlqar Əsədov qeyd edib.
