Gəncədə bir sıra ağacların vəziyyəti sakinləri narahat edir. Bu haqda Gencexeber.az-a 23 iyul tarixində məlumat daxil olub.
Sözügedən hal şəhərin Zülfü Hacıyev küçəsində, Dəmir yolu vağzalının qarşısında müşahidə olunur. Sakinlərin sözlərinə görə, səkiyə asfalt örtüyü salınan zaman ağacların gövdəsinin ətrafı çox bağlanıb. Nəticədə bitkilərə zərər vurulur, onların inkişafı üçün çətinlik yaranır.
Vətəndaşlar bu səbəbdən ağacların quruyacağından narahatdırlar.
“Bitkilərin dibi az qala tam asfaltlanıb. Belə olan halda ağaclar nə tökülən suyu içə bilir, nə də kökləri nəfəs alır. Məsələ ilə bağlı aidiyyəti qurumların müvafiq tədbirlər görməsini istəyirik”, - deyə onlar qeyd ediblər.
