9 yaşlı Gülay Əliyevanın sağlamlıq imkanları məhduddur. Ailəsi ilə Tovuzun Aran Şamlıq kəndində yaşayan balacanın sol ayağı digər ayağından qısadır.
Xezerxeber.az məlumat verir ki, anadangəlmə problemə görə 2020-ci ildən sosial müavinət alan Gülayın əlillik müddəti bitdiyinə görə təkrar əyani müayinəyə cəlb edilib və lazımı sənədlər müvafiq qaydada sistemə yüklənib. Lakin bir neçə dəfə müraciət edilsə də, tələb olunan forma 88 tərtib edilsə də, ailə həmişə imtina cavabı ilə üzləşib: 7-8 aydır uşağın pensiyası kəsilib.
Dövlət Tibbi-Sosial Ekspertiza və Reabilitasiya Agentliyindən redaksiyanın mövcud problemlə bağlı sualına cavab olaraq bildirdi ki, uşaq yenidən əyani müayinəyə cəlb olunacaq. Nəticədən asılı olaraq əlillik dərəcəsinin təyin olunması ilə bağlı müvafiq qərar veriləcək.
