Gəncə Şəhər İcra Hakimiyyətinin təşəbbüsü ilə şəhərin ekoloji tarazlığının qorunması və yaşıllıq zolaqlarının artırılması məqsədilə gül əkini aksiyası davam edir. Bu haqda 20 iyul tarixində MKTİB-yə istinadən xəbər veririk.
Şəhərin bir neçə məkanına iqlim şəraitinə uyğun güllər əkilib. Mənzil Kommunal Təsərrüfatı İstehsalat Birliyinin Yaşıllaşdırma şöbəsi tərəfindən bu dəfə Heydər Əliyev prospektində yerləşən dairədə və mərkəzi meydanda mövsümi dekorativ gül-çiçəklər əkilib. Güllərin daha uzunömürlü olması üçün əkindən öncə ərazilər torpaq, torf və müxtəlif gübrələrlə zənginləşdirilib.
Gül əkini ilə paralel olaraq, Yaşıllaşdırma şöbəsinin əməkdaşları birliyin texnikası vasitəsilə şəhərin müxtəlif ərazilərində yaşıllıqların suvarılması və ot biçini işlərini də davam etdirirlər. Bu kimi ekoloji aksiyaların məqsədi şəhərdə yaşıllıq zolaqlarının genişləndirilməsi və insanlar arasında ekoloji mədəniyyətin, təbiətə qayğı hissinin güclənməsinə böyük töhfə verməkdir.
