Gəncədə yolların birində piyadalar üçün maneə yaranıb. Bu haqda Gencexeber.az-a 24 iyun tarixində məlumat daxil olub.
Söhbət Sadıllı qəsəbəsindən gedir. Qəsəbə stadionuna gedən piyada yolu təmir işləri səbəbindən qazılıb.
Bu hal ərazidə yaşayan və piyada yolundan istifadə edən sakinlərin etirazına səbəb olub. Onların sözlərinə görə, piyada səkisi qazıldığına görə burada hərəkət etmək mümkün olmur. Yola davam etmək üçün məcbur avtomobil yoluna çıxmalı olurlar.
“Səki bir aydan çoxdur qazılıb, işlər gedir. İnşaat malları satılan obyektlərin avtomobilləri də yolun kənarında dayanıblar, məcbur olub avtomobil yoluna çıxırıq. Hər gün təhlükə ilə üzləşirik”, – deyə sakinlər bildiriblər.
