Gəncə şəhər başçısı ilə Gürcüstanın şəhərimizdəki yeni baş konsulu arasında görüş olub. Bu haqda 30 iyul tarixində İcra Hakimiyyətinə istinadən xəbər veririk.
Görüşdən əvvəl rəsmilər ulu öndər Heydər Əliyevin abidəsini ziyarət edib, önünə gül dəstələri düzüblər. Niyazi Bayramov şəhərimizin tarixindən söz açıb, sənaye və iqtisadi potensialından danışıb. Bildirib ki, hazırda şəhərdə “Gəncə Avtomobil Zavodu” İstehsalat Birliyi, “AzərAlüminium” ASC, “Gəncə Şərab - 2” və digər iri sənaye müəssisələri mövcuddur. Eyni zamanda, ötən gündən etibarən “AzerGold” QSC-nin törəmə şirkəti - “AzerBlast” MMC tərəfindən istifadəyə verilən ilk sənaye partlayıcı maddələrin istehsalı zavodu da tam rejimdə fəaliyyətə başlayıb.
Kaxaber Abdaladze qeyd edib ki, Azərbaycan və Gürcüstan xalqları tarixən dostluq münasibətlərini qoruyub saxlayıblar. Bu münasibətlərin inkişafına hər iki ölkənin regionları arasında qurulan əməkdaşlıq əlaqələri də təsirsiz ötüşmür. Söhbət zamanı bu əlaqələrin genişləndirilməsi istiqamətində atıla biləcək addımlar, gələcək perspektivlər müzakirə olunub.
