Gəncə şəhər 1 nömrəli tam orta məktəbdə minifutbol yarışı start götürüb. Bu haqda 8 may tarixində Kəpəz televiziyasına istinadən xəbər veririk.
Birinciliyin açılış mərasimində idman ictimaiyyətinin nümayəndələri, “Kəpəz” futbol klubunun baş məşqçisi Adil Şükürov və futbolçular iştirak ediblər. Burada vurğulanıb ki, belə yarışlar yeniyetmələrin gələcəkdə idmana meyillənmələri üçün əhəmiyyətli hesab edilir.
Yarışın bədii hissəsində şagirdlər bacarıqlarını nümayiş etdiriblər. Güləşçilər döşək üzərinə çıxıb, gimnastlar musiqi sədaları altında müxtəlif idman hərəkətləri ediblər. Daha sonra məktəblilərin musiqi alətlərində ifası, oynaq havaların fonunda rəqsi xoş ovqat yaradıb. Açılışdan sonra ilk oyun keçirilib. Yarışda 11 kollektiv qüvvəsini sınayıb.
Yarışın baş hakimi Taleh Məmmədovun sözlərinə görə, müsabiqənin məqsədi uşaqlarda futbola marağı artırmaqdır. “Tədbir çox maraqlı idi. Ümid edirəm ki, məktəblilər arasından yaxşı futbolçular yetişəcək”, deyə “Kəpəz”in oyunçusu Olavale Onanuqa qeyd edib.
