Gəncədə Teatr Günü ilə əlaqədar tədbir keçirilib. Bu haqda 28 mart tarixində Kəpəz televiziyasına istinadən məlumat veririk.
“Teatrda bir gün” adlı tədbir Gəncə Dövlət Kukla Teatrında təşkil olunub. Teatrın qarşısında yaradıcı heyət öz balaca tamaşaçılarını qarşılayaraq şar-şou nümayiş etdirib. Onlar burada uşaqlarla birgə rəqs ediblər. Daha sonra teatrda balacalar üçün maraqlı oyunlar təşkil olunub.
Bundan başqa, teatrın tarixini əks etdirən tamaşalardan ibarət film də nümayiş etdirilib. Ardından balacalar üçün “A Kosa, hara yaxşıdır?” adlı tamaşa səhnəyə qoyulub. Novruz adət-ənənələrindən bəhs olunan tamaşada teatrın bütün yaradıcı heyəti rol alıb. Novruzun əsas personajları Kosa və Keçəl, eləcə də Bahar qız balaca tamaşaçılara Vətənə, torpağa bağlılıq, böyüklərə hörmət və adət-ənənələri yaşatmağı təbliğ ediblər.
