Gəncədə qanunsuz ticarətlə bağlı tədbirlər həyata keçirilib. Bu haqda 30 aprel tarixində Apa-ya istinadən məlumat veririk.
Şəhər Baş Polis İdarəsinin əməkdaşları küçə ticarətinin qarşısının alınması məqsədilə monitorinq aparıblar. Nəticədə səkiləri zəbt edərək piyadaların hərəkətini çətinləşdirən, küçələrdə antisanitar vəziyyət yaradaraq pərakəndə ticarətlə məşğul olan satıcılar aşkarlanıblar.
Həmin şəxslərlə izahedici söhbətlər aparılıb. Onlara yalnız müəyyən olunan yerlərdə ticarətlə məşğul olmaları bildirilib. Baş İdarə əməkdaşları tərəfindən qanunsuz küçə ticarəti ilə məşğul olan və qanunsuz reklam lövhələri yerləşdirən şəxslər barəsində İnzibati Xətalar Məcəlləsinin müvafiq maddəsi ilə protokol tərtib edilib.
Həmçinin şəhər ərazisində fəaliyyət göstərən bir neçə avtoyuma məntəqəsində çirkabın yola axıdılması və bir neçə mağazanın yanında məişət tullantılarının qalaqlanması nəticəsində antisanitar vəziyyətin hökm sürməsi müşahidə olunub.
Həmin obyekt sahibləri ilə profilaktiki söhbət aparılıb və barələrində qanunamüvafiq tədbir görülüb.
