Bu gün Gəncə təmsilçisinin məşqçisinin doğum günüdür. Bu haqda 16 avqust tarixində futbol klubuna istinadən məlumat veririk.
Söhbət “Kəpəz”in baş məşqçisi Adil Şükürovdan gedir. Futbol mütəxəssisinin bu gün 47 yaşı tamam olur.
Adil Teymur oğlu Şükürov 16 avqust 1977-ci ildə Laçında dünyaya gəlib. Daha sonra ailəsi ilə Bakıya köçüb və burada 1984-cü ildə birinci sinfə gedib. 1994-cü ildə orta məktəbi bitirən gənc Azərbaycan Dövlət Bədən Tərbiyəsi və İdman Akademiyasına daxil olub. Həmin vaxt məşqlərini davam etdirib.
Şükürov 1985-ci ildən "Neftçi" futbol cəmiyyətində ilk dəfə olaraq Ruslan Abdullayevin rəhbərliyi altında futbolun sirlərinə yiyələnməyə başlayıb. Müxtəlif vaxtlarda “AZAL”, “Zabrat”, “Fərid”, “Şəfa”, “Bakılı”, “Kəpəz”, “Traktor” (İran), “Karvan” və “Gənclərbirliyi” klublarının şərəfini qoruyub. Həmçinin bir sıra komandaların məşqçisi olub.
13 noyabr 2023 tarixindən etibarən isə Adil Şükürov “Kəpəz” PFK-nın baş məşqçisi vəzifəsini icra edir.
