Gəncədə sakinlər kommunal problemlə üzləşiblər. Bu haqda Gencexeber.az-a 29 aprel tarixində məlumat daxil olub.
Söhbət şəhərin İsaq Cəfərov küçəsindən gedir. Ərazidə yaşayan sakinlərin sözlərinə görə, evlərə su cədvəllə verilir. Bir neçə ay öncəyədək vətəndaşlar suyu həm səhər, həm axşam müəyyən saatlarda istifadə ediblər. Lakin bir müddətdir ki, su hər gün səhər 9:00-dan 13:00-dək gəlir.
Bu hal onların narahatlığına səbəb olur. Sakinlər bildirirlər ki, sözügedən saatlarda işdə olduqları üçün su ehtiyatını toplaya bilmirlər.
“Əvvəl həm səhər, həm axşam verilirdi su. Kimə hansı saat uyğun idi, istifadə edirdi. İndi ancaq səhərdən 4 saat ərzində gəlir. O saatlarda da biz işdə oluruq. Bakı açıb gedəndə də daşır, boşuna xeyli su axır. Şikayət edirik, lakin heç bir tədbir görülmür. Bir neçə aydır ki, belə əziyyət çəkirik. Suyun daha öncəki qrafiklə verilməsini istəyirik”, - deyə onlar qeyd ediblər.
