Gəncə şəhərində daha bir proqram həyata keçirilir. Bu haqda 6 avqust tarixində İcra Hakimiyyətinə istinadən xəbər veririk.
AYİB-nin maliyyə dəstəyi ilə ölkəmizdə ilk dəfə olaraq İcra Hakimiyyətinin “Antikorrupsiya ilə bağlı Fəaliyyət Planı” və digər zəruri sənədlər hazırlanır. 2024-cü il iyul ayının 28-dən avqust ayının 2-dək İcra Hakimiyyətində İngiltərənin “GoodCorporation” şirkəti tərəfindən “Korrupsiyaya Qarşı Mübarizə üzrə Təlim Proqramı” həyata keçirilib. Təlimə İcra Hakimiyyəti başçısı Aparatının və Mənzil Kommunal Təsərrüfatı İstehsalat Birliyinin əməkdaşları cəlb olunublar.
Təlim zamanı iştirakçılara antikorrupsiya, bu sahədə ümumi tələblər, həyata keçirilməli olan tədbirlər və s. məsələlərə dair məlumatlar verilib, nümunələr üzərində müzakirələr aparılıb. Təlim proqramı hazırlanarkən Azərbaycanın qanunvericiliyinə, eləcə də qabaqcıl beynəlxalq təcrübəyə əsaslanılıb.
